المبرمج بطيبعة الحال وطبيعة شغله بيبقة درجة معرفته بالكمبيوتر والكود اكبر بكتير من الشخص العادي بس بس في شوية حاجات كده قليل من المبرمجين يعرفوها ولا اي حاد تاني يعرفها.

حقيقة رقم 1

برامج كتير من اللي بنعتمد عليها بشكل يومي زي Operating System او Web Application مليانة أكواد بيتقال عليها بالبلدي “عك” او كود ملخبط بس شغال والنوع ده من الكود بيتقال عليه Hacks وهو بيبقة هدفه في البداية تجربة الفكرة ومع الوقت بيبقة جزء اساسي من المشروع وفي اللي بيلحق نفسه ويعمل Code Refactor وفي اللي بينسى.

حقيقة رقم 2

أكتر من 25% من شغل المبرمج عبارة عن انه يفكر في ايه اللي ممكن المستخدم يعمله غلط ويعمله Handling ودي حقيقة مريرة جدا وكتير من الغير مبرمجين ميتوقعوهاش. خصوصا الـ Web Developer اللي بيشتغل على موقع بيستخدمه الملايين.

حقيقة رقم 3

المبرمج مش بينزل وندوز يا جدعان … المبرمجة شغلته انه يعمل برامج ومش انه يصلح جهاز وينزل وندوز والكلام ده … مش شغلتنا والله … كل عائلة فيها الـ Bill Gates الخاص بيها اللي هو مدام بيفهم في حاجة في الكمبيوتر يبقة بيعرف يعمل اي حاجة تانية ولو قولت متعرفش يبقة ناكر الجميل ومش متربي … ارحموا اهالينا بقة.

حقيقة رقم 4

البرمجة مش كتابة كود وبس بالعكس البرمجة هي معتمدة على الدماغ وطريقة التفكير المنطقية وازاي تفكر في حل للمشكلة … دا اهم بكتير جدا من انك بتشتغل بـ Programming Language الفلانية ولا الـ Framework العلانية الموضوع اكبر وأهم من كده بكتير.

حقيقة رقم 5

العد في البرمجة دائما بيبتدي من 0 مش من 1 ودا Zero-based numbering وهي طريقة للعد وبيبقة بداية الـ index فيها بالرقم 0 بدل 1.

حقيقة رقم 6

المبرمج المحترف (الشاطر) ميعرفش يشتغل تحت ضغط او لو مزاجة مش تمام … يعني لازم يبقة مرتاح ومزاجة عال عشان يقدر يبدع ويطلع شغل محترم والنقطة دي بقة اللي اسمها ( In The Zone ) وهي اللي بيبقة عندها المبرمج في قمة التركيز ولو الدنيا حوليه بيحصل فيها ايه ولا يهمه … حنى لو عاوز يدخل الحمام بيبقة كل تركيزه في اللي بيعمله.

حقيقة رقم 7

لما المبرمج ينام وفي مشكلة واكله دماغه بيصحى بحلها … دي حاجة غريبة وعجيبة جدا … يبقة في مشكلة قدامي وبقالي ساعات بحاول احلها وأدخل أنام والمشكلة لسة متحلتش ولما أصحى الصبح اول ما بفتح عيني الحل يجيلي في دماغي زي اللمبة لما تنور كده.

حقيقة رقم 8

المبرمج الحقيقي اللي اشتغل كتير ميعرفش يتنطت او يفتخر باللي عمله أنه عارف كويس ان في احسن منه وفي حاجات كتير لسة ميعرفهاش ودا راجع لأن العلم ده مبيخلصش لأنه معتمد على الدماغ فكل يوم بتطلع حاجات جديدة.