أنواع العملاء “المشكلة” في العمل الحر

Standard

من الصعب إذا كان من المستحيل في أي مجال إنك متلاقيش العملاء من نوعية بتوع المشاكل أو بالبلدي كده العملاء المقرفين. فا حبيت أشارك معاكم أنواع العملاء المقرفين دول اللي عدوا عليا واذاي تكتشفهم بدري وتستأصلهم من حياتك نهائي.

1- العميل البخيل “الجلدة”

انا مش هدفع أكتر من 1750 !!

انا مش هدفع أكتر من 1750 !!

النوعية دي من العملاء بتبقة شخصية إستغلالية بطابعه هتلاقيه بإستمرار بيهطل عليك بالوعود المغرية بالشغل والمشاريع المستقبلية واللي بتبقة كلها على فشوش … أيوة انت قريت صح بتبقة فشنك وإشتغالة كمان … وتعرف النوعية دي بإنه بيهرب من السؤال عن ميزانية المشروع “متعرفش إزاي !!!” وهو خبير في الحتة دي جدا وكل شوبة بيبقة عاوز يزود حاجة على المشروع وسط ما أنت شغال أو لما تخلص الجزء الأكبر منه ودا بيحسسك بالإحباط الشديد لأنك بتكون خلاص قربت تخلص وتسلم الشغل وتاخد فلوسك … بس إزاي ؟ هو ده ينفع برده ؟ أومال بيبقة عميل رخم إزاي.

2- العميل الرغاي “اللزقة”

لبخة

مصدر الصورة: SitePoint.com

العميل ده بقة بيبقة بيحط عليك وبيهريك مكالمات وإميلات على طول … بسبب ومن غير سبب ودا بيخليك متعرفش تشتغل ولا تخلص حاجة … ممكن يقعد يكلمك ساعة وبيتكلم كتير جدا ولو مردتش على الموبايل يكلمك على الـ Viber ولو مردتش يكلمك على الـ WhatsApp … وبيبقة متوقع أنك هتخلص المشروع في لمح البصر وبسرعة البرق … فيتصل بيك كل يوم يشوف إيه اللي خلص ولسة إيه ومخلصش ليه ويضيع وقت ويشتت تفكيرك بطريقة مستفزة جدا.

3- العميل شبح “البارد”

مبتردش عليا ليه يإبن النضايقة ؟

مبتردش عليا ليه يإبن النضايقة ؟

ده بقة عكس العميل المتوتر تماماً … لا يكلمك ولا يتبعك في الشغل خالص لدرجة أنك لوعندك مشكلة في المشروع ومحتاج توضيح أو تعديل ومينفعش تكمل من غرها ممكن ميردش عليك خالص ولو رد يبقة بعدها بإسبوع … ده بقة يجبلك شلل مبكر على طول وهيضيعلك وقت كبير على الفاضي.

4- العميل القرفان “مبيعجبوش حد”

كلام نسوان

كلام نسوان

العميل ده بقة هتلاقيك بيشتم ويغلط في اللي قبلك وإن شغله مش كويس ومواعيده مش مظبوطة بغض النظر عن أنه كده فعلا ولا لاء … تقريبا هو بيبقة فاكر أنه كده بيحمسك ويشجعلك على أنك تثبت نفسك وتبقة احسن من الناس اللي اشتغلوا معاه عشان نكسبة كعميل دائم … الحقيقة بقة إن الموضوع غير كده خالص وبعد ما تخلص المشروع هيعمل فيم كده برده وعمره ما هيقول كلمة كويسة عنك زي ما عمل مع غيرك.

5- العميل اللي مش فاهم “التاية”

3-heemhamoo النوع ده من العملاء برده بيضيع وقتك جدا لإنه اساساً مش عارف هو عاوز إيه … كل اللي بيعمله أنه يديك الفكرة اللي هو عاوز يعملها من غير خطوط عريضة حتى ومتوقع منك إنك اللي تعمل كل حاجة بقة وتقوله إيه اللي يتعمل … بمعنى أصح “تفكر بالنيابة عنه” … وهتلاقي نفسك بتضيع وقت كبير جدا تحاول تعرف منه هو عاوز يعمل ايه بدل ما تستغل الوقت في التنفيذ.

6- العميل الفهلوي “اللئيم”

مصدر الصورة: http://ghrebaa.com/post/76520313547

مصدر الصورة: http://ghrebaa.com/post/76520313547

النصيبة ده بقة بيحب بتلائم عليك جدا ويحسسك أنه فاهم كل حاجة وبيبقة عنده هاجس انك عاوز تضحك أو تنصب عليه وخلاص … ده بقة أو رد يقولهولك على الـ Proposal بتاعك بالظبط هو كالتالي “كتير على فكرة دا فلان الفلاني مستعد ينفز المشروع في وقت وتكلفة أقل” … ده بقة ترد عليه “أتفضل حضرتك خلي فلان الفلاني ده يعملهولك وشكراً مع السلامة” … على طول كده تقوله من غير مناقشة ووجع قلب … ولو لقدر الله اتفقت معاه هيقرفك جدا جدا وهيحاول يمص دمك على قد ما يقدر ويقولك “أنا دفعلك فلوس” … في اللحظة دي بقة المفروض تقوله كلمة قبيحة ميصحش أقولهلكم 😀

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.