الفرق بين الشغل في شركات كبيرة وشركات صغيرة والشغل حر

Standard

مبدأياً كده الموضوع ده بيختلف من شخص للتاني … يعني متاخدش كلامي ده على انه كلام مسلم بيه … فكر فيه كويس وممكن جدا من الحاجة اللي هتقراها تناسبك وممكن لاء … أنا بس حبيت اشراك بتجربتي ورأي في الموضوع ده لعل حد يستفيد منها.

الشغل في الشركات الكبيرة Big or Enterprise Companies

المميزات – Pros

  • اسمك انك بتشتغل في شركة كبيرة ومعروفة ليه رونقة خصوصا في مجتمعنا المصري بغض النظر عن المرتب او بتعمل ايه بالظبط … اي حد لما يجي يسألك عن شغلك بيقولك على طول “انت بتشتغل فين ؟”
  • المرتب بيبقة محترم ويعيشك كويس وممكن يبقة مرتب كبير كمان و overtime وزيادات كل سنة والحوارات دي.
  • في نظام دايما في عمل اي حاجة وخطوات ومين بيعمل ايه وفي سياسة شغل.
  • في مواعيد للحضور والانصراف.
  • هتلاقي ساعي بيعملك المشاريب وطلباتك ويديك برستيجك يعني.
  • عدد الموظفين معظم الاحيان بيبقة كتير والفريق اللي هتشتغل معاه هيبقة كبير وده ممكن يدي الاحساس بالحيوية وهتتعرف على شخصيات مختلفة في وقت صغير.
  • هيبقة في طبعا تأمينات وبتكون كويسة ( بتعتمد على الشركة نفسها وشكل التعاقد ).
  • ممكن يبقة في شوية حاجات دلع شوية زي رحلات وجيم وحاجات زي كده.

العيوب – Cons

  • الخبرة اللي بتاخدها في الشغل بتبقة ضعيفة جدا لان في معظم الاحيان الشغل بيبقة روتيني نوعا ما وحاجات صغيرة جدا.
  • أسمك وحياتك مرتبطين بالشركة يعني ملكش شخصية منفصلة وأي إنجاز شخصي في الشغل هيتنسب للشركة.
  • الشركة بتبقة امتلكتك خلاص لانها عودتك على نمط شغل وتفكير معين فا مش هتعرف تسيب الشغل لانك اتعودت على style في الحياة وفي نفس الوقت لأن خبرتك ضعيفة جدا مفيش شركة تانية هتبقل تشغلك تاني لأنهم عارفين اللي فيها.
  • هيبقة في كذا واحد زيك بيعمل نفس شغلك … يعني ممكن يبقة في كذا واحد frontend developer مثلا.
  • مش هتحس انك بتعمل شغل زو قيمة او انك بتنجز حاجة لانك في فريق كبيرة ومعظم الاحيان بتشتغلوا على مشاريع صغيرة.
  • لو هتعوز تعمل فكرة جديدة لو تجرب حاجة لازم تاخد موافقة اللي فوقك وهو ياخد موافقة اللي فوقه وهكذا ولإن في سياسة شغل ولازم تتبع.
  • مفيش اي نوع من انواع التحدي في شغلك انك زي ما قولت شغل روتيني وكل اللي بتعمله انك تجيب حاجة تركبها او تستخدمها عشان تخلص ال تاسك المطلوبة وخلاص.
  • الترقيات هتبقة صدمة شوية انك بمنتهى البساطة ممكن تلاقي حد اترقى وهو او هي اقل منك بس عشان مظبط كويس وكلمنجي كويس مش عشان هو كفء … احنا لكنا عارفين النوعية دي.
  • مش كل الشركات الكبيرة بتطبق مواعيد العمل مظبوط يعني ممكن توصل الشغل في وقت معين بس متمشيش إلا لما تخلص اللي مطلوب منك … زي البنوك مثلا.

الشغل في الشركات صغيرة Small or Startup Companies

المميزات – Pros

  • بتاخد خبرة محترمة جدا وبتتعلم حاجات كتيرة خصوصا لو في شركة Startup لأنك بتعل حاجات كتيرة او حاجة كبيرة.
  • بتتعلم انك تتحمل مسؤلية لانك ممكن تعمل مشروع كامل لوحدك او تشتغل في كذا مشروع في نفس الوقت.
  • المرتب بيعتمد على الشركة نفسها … ممكن يبقة كبير وممكن يبقة صغير وفي الاغلب بيعتمد على نوعية الشغل اللي بتعمله الشركة ودورك ايه وصاحب الشركة نفسه.
  • الفريق اللي بتشتغل معاه بيبقة في الاغلب صغير ودا بيخلي التواصل بينكم احسن.
  • قدامك المجال واسع للابتكار والتجربة ومفيش التعقيد اللي موجود في الشركات الكبيرة.
  • لو الشركة Startup والفكرة نجحت هتكبر مع الشركة وهيبقة ليك فضل كبير جدا وهتحس بانجاز وفخر كبير جدا.
  • ممكن مع الوقت تفتح شركة خاصة بيك او يبقة عندك فكرة Startup والخبرة اللي أختها من الشغل هتفيدك جدا.

العيوب – Cons

  • غالبا بتبقة الشركات دي مش معروفة ( تحت السلم زي ما بيقولوا ) ودا شيء مهم جدا في مجتمعنا المصري للأسف.
  • احياناً المرتب مبيكونش مضمون ودا نتيجة لسياسة الشركة وخطتها ونوعية الشغل اللي بتعمله.
  • الفريق لما بيكون صغير ساعات بيبقة عيب لو الناس اللي في الفريق مفيش تواصل مابينهم كويس.
  • شغل ال overtime معظم الاحيان بيبقة من غير مقابل.

نقاط مشتركة مابين كل انواع الشركات Common Points

المميزات – Pros

  • هتتعلم تصحى الصبح بدري وتنزل في معاد كل يوم ودا شيء كويس جدا.
  • اسمك انك بتشتغل في شركة في المجتمع المصري شيء أساسي مش عارف ليه !!!
  • الصداقة اللي بتتكون في الشغل بتبقة كويسة جدا لانك بتتعرف على الناس في كل حالتهم.

العيوب – Cons

  • مفيش شركة مضمونة خصوصا في مصر … أي شركة ممكن تقفل تاني يوم.
  • معظم الشركات في مصر بيعتمدوا على انهم يستغلوا او بمعنى ادق يحلبوا ” لمؤخذة ” الموظف على قد ما يقدروا.
  • العقود مش مضمونة لأن بمنتهى البساطة بيتحطلك بند في العقد يخليك تقدم استقالتك بنفسك عشان حقوقك تضيع عليك.
  • معظم الشركات في مصر بتهتم بالموظفين الكبار على حساب الموظفين الصغار … يعني ممكن تلاقي Web Developer بياخد 3000 جنية والـ Team Leader بياخد 3 اضعافه !!! ودا في كل المجالات للأسف.
  • في شركات بتعتمد على internship programs بحجة التدريب لكن في الحقيقة بيفحتوهم شغل.
  • في شركات في مصر بتدي مرتبات كويسة جدا وبدالات وزيادات وشوية حاجات حلوة كده بس بتستعبد الموظفين بطريقة … يعني ممكن يشتغلوا من 8 الصبح لـ 12 بليل كل يوم متواصل !!!! طيب ما انت كده بتاكل في صحتك وعفيتك هتيجي يوم لازم هتقع.

الشغل الحر Freelancing

المميزات – Pros

  • أنت حر نفسك وبتعمل اللي انت عاوزه.
  • بتكون اسم و Career لنفسك وبتسوق لنفسك.
  • المقابل المادي بيبقة كويس جدا لانك بتاخد الفلوس مقابل الشغل اللي عملته فعلا مش مجرد مرتب … وكل ما كان المشروع كبيرة كل ما كان المقابل كبير وكل ما الـ Portfolio بتعاك يكبر.
  • بيبقة في تنوع كبير في المشاريع وتحديات مختلفة ودا بيزود خبرتك باستمرار ويخليك تتعلم حاجات جديدة على طول.
  • أنت اللي بتقيم المشروع وبتحدد الوقت والتكلفة.
  • بتاخد خبرة أكبر في التعامل مع الناس والتفاوض وبتنمي مهارات التواصل واستخراج المعلومات وتحللها … لانك بتبقة مسؤل عن تنفيز متطلبات العميل في المشروع.
  • بتبني علاقات كويسة لانك بتتعامل مع عملاء كتير ( من داخل وخارح مصر ) منهم اشخاص ومنهم شركات.
  • مش مرتبط بمكان معين وممكن تعمل شغلك من أي مكان.
  • تقدر تاخد اجازة او راحة بسهولة أو حتى تسافر في اي حتة تغير جو وتخلص شغلك برده.

العيوب – Cons

  • حياتك مش هتبقة متنظمة في اغلب الحيان لو انت منظمتهاش بنفسك.
  • مفيش استقرار للدخل في البداية في البداية.
  • في مصر المجتمع لسة مش فاهم كويس فكرة العمل كـ Freelancer يعني لو قولت لحد كبير في السن شوية ( 45 وانت طالع ) او بعيد عن ثقافة معينة هيقولك “شغال بالحتة يعني”
  • ممكن يخليك تنعزل عن المجتمع شوية خصوصاً انك مش مرتبط بمكان او شركة بس في نفس الوقت الـ Coworking Spaces في مصر أبتدت تنتشر وبتعالج النقطة دي.

الخلاصة – Bottom line

محدش يقدر يقولك تعمل ايه أو انهي الأحسن لإن بإختصار اللي يناسبك ممكن لا يناسب غيرك وكل حاجة ليها مميزات وعيوب وهيعتمد على اهدافك وترتيبك لحياتك وإيه اللي عاوز تعمله.

رأي الشخصي – Personal Opinion

شخصياً انا بفضل العمل الحر وبيناسبني وبيناسب متطلباتي ولو حابب تشغتل Freelancer هيبقة مناسب ليك لو انت فاهم كويس المجال بتاعك يعني مش مناسب لو واحد لسة بيتعلم وبيجرب لأن في الـ Freelancing الموضوع معتمد على الـ Reviews اللي عملائك بيقدموها ومعتمد على العلاقات ولو العميل عجبه شغلك وفكرك هيبقة عاوز يشتغل معاك تاني … فا ممكن تبتدي تشتغل في شركة صغيرة او Startup عشان تتمكن من المجال بتاعك كويس وتبقة فاهم الدنيا كويس وفيها ايه وبعدين تستغل Freelancing وممكن تبتدي على طول Freelancing بس لو انت بالفعل فاهم المجال كويس واتعلمت كويس.

ملحوظة : المقالة دي مستوحاة من Mohamed Maher Nasr’s post و Mohamed Shokr

7 thoughts on “الفرق بين الشغل في شركات كبيرة وشركات صغيرة والشغل حر

  1. مقال رائع وجميل ومنظم بشكل بسيط وواضح

    ولكن جزئية خاصة بالعمل الحر انك بتكتسب مهارات كثيرة في مجالات كثيرة
    وبيطالبك الناس بمسمى تعريفي
    وتبقي من كتر الحجات اللي جربتها واشتغلت عليها عايز تقوله انا اعرف اعملك ده

    بس هو عايز يحشرك في قالب وتعرف نفسك انا بتاع كذا وبس يبقي انت شغال مع نفسك بتاع كذا

    طيب ما انا اقدر اشتغل كذا حاجة واقدر انفذها بكفاءة ودقة ازاي نربط الجزئين دول ببعضهم ؟

    وشكرا

Leave a Reply

Your email address will not be published. Required fields are marked *